image

Ամենայն Հայոց Կաթողիկոսն ընդունեց Ռումինիայում ՀՀ նորանշանակ դեսպանին

Ամենայն Հայոց Կաթողիկոսն ընդունեց Ռումինիայում ՀՀ նորանշանակ դեսպանին

Դեկտեմբերի 4-ին Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Ռումինիայի Հանրապետությունում Հայաստանի Հանրապետության արտակարգ և լիազոր դեսպան Սերգեյ Մինասյանին:

Հանդիպմանը Նորին Սրբությունը շնորհավորեց դեսպանին նշանակման առիթով՝ մաղթելով արդյունավետ գործունեություն ի նպաստ Հայաստանի և Ռումինիայի միջև բարեկամական հարաբերությունների ու գործակցության առավել ամրապնդման:

Վեհափառ Հայրապետն անդրադարձ կատարեց դեռևս վաղ միջնադարից ձևավորված հայ-ռումինական սերտ կապերին, ինչպես նաև հայ համայնքի պատմական կարևոր դերակատարությանը Ռումինիայի քաղաքական, տնտեսական և մշակութային կյանքում` նշելով, որ շնորհիվ գովարժան իր վաստակի ռումինահայությունն այսօր վայելում է երկրի իշխանությունների հարգանքը:

Զրույցի ընթացքում պրն. Մինասյանը շնորհակալություն հայտնեց Ամենայն Հայոց Կաթողիկոսին օրհնության և բարեմաղթանքերի համար՝ հավաստիացնելով, որ իբրև դեսպան պիտի իր ջանքերը ներդնի հայ-ռումինական հարաբերությունների ամրապնդման համար: Նորանշանակ դեսպանը իր առաքելության մեջ կարևորեց գործակցությունը Ռումինիայի հայոց թեմի և ազգային հաստատությունների հետ:

Խոսվեց նաև Հայաստանյայց Առաքելական և Ռումին Ուղղափառ Եկեղեցիների ջերմ հարաբերությունների մասին:

Հանդիպմանը ներկա էր Մայր Աթոռի Արտաքին հարաբերությունների և արարողակարգի բաժնի տնօրեն Գերաշնորհ Տ. Նաթան արքեպիսկոպոս Հովհաննիսյանը: