Լիբանանի Բեգաա դաշտավայրում գտնվող Բաալբեկ պատմական քաղաքում այս պահին ընթանում է Բաալբեկի ավանդական երաժշտական փառատոնը, որն այս տարի, համավարակի պատճառով, հեռարձակվում է հեռուստատեսությամբ: Հազարավոր հանդիսականներ հեռավար հետևում են լիբանանահայ տաղանդավոր երաժիշտ Հարութ Ֆազլյանի ղեկավարությամբ Լիբանանի Ֆիլհարմոնիկ նվագախմբի համերգ-կոմպոզիցիային՝ «Դիմադրության ձայնը» խորագրով։ Երաժշտական կոմպոզիցան նվիրված է Լիբանանի և համայն աշխարհի այսօրվա աննախադեպ վիճակին:
9000 տարվա պատմություն ունեցող Հռոմեական կայսրության ավերակների վրա գտնվող Բաալբեկ նշանավոր վայրում (որ Տիգրան Մեծի ժամանակ կոչվել է Արև-Քաղաք) 1955 թ.-ից անցկացվող միջազգային փառատոնն առաջին անգամ անցկացվում է առանց հանդիսատեսի ներկայության:
Կազմակերպիչները փառատոնը համարել են պատմական, իսկ հայ երաժիշտ Հարութ Ֆազլյանի գլխավորած նվագախմբի՝ այս օրերին չդադարող աշխատանքը՝ համախմբման և նաև արվեստի միջոցով վերածնման խորհրդանիշ: Փառատոնին ողջույնի խոսքեր են հղել միջազգային այլ փառատոների կազմակերպիչներ՝ աշխարհի տարբեր երկրներից, նշելով, որ երաժշտական Բաալբեկը հույսի և միասնության կոչ է տարածում աշխարհում: