Պէյրութի բախումներուն հետեւանքով վիրաւորուածներուն թիւը հասած է 169-ի։
Այս մասին տեղեկութիւնը հաղորդեց MTV կայանը, նշելով, որ վիրաւորներուն մեծ մասը հիւանդանոց փոխադրուած է «Լիբանանի կարմիր խաչ»ի օգնութեամբ։
Կը նշուի նաեւ, որ կարգ մը վիրաւորներու պարագան մտահոգիչ է, որովհետեւ անոնք հարուածներ ստացած են իրենց գլուխէն։
Իրավիճակը ծանրացած է այն բանէն ետք, երբ ցուցարարներու մէկ մասը անցած է խուլիկանական արարքներու՝ ջարդելով դրամատուներու եւ վաճառատուներու ցուցափեղկեր ու աւելի ուշ քարեր եւ պայթուցիկ նիւթեր նետելով ՆԳՆ-ի ուժերուն ուղղութեամբ։
Կը նշուի նաեւ, որ փոքր չէ թիւը ՆԳՆ-ի ուժերու շարքերուն մէջ վիրաւորներուն, յայտնելով նաեւ, որ կարգ մը ոստիկաններ ներկայիս կը գտնուին հիւանդանոցներու վերակենդանացման բաժնին մէջ։
Յիշեցնենք, որ այսօր իր լրումին կը հասնի համալիբանանեան տարողութիւն ունեցող ցոյցերուն 95-րդ օրը եւ մինչեւ այս պահը երկրի տագնապին նպաստաւոր լուծում մը գտնելու յոյսերը կը շարունակեն մնալ աննշան։