Վենետիկի Սուրբ Ղազար կղզիի մէջ ջրհեղեղի վտանգը նահանջած է: Այս մասին NEWS.am-ի հետ զրոյցին մէջ նշած է Հայկական միաբանութեան եղբայրներէն մէկը՝ աւելցնելով, որ ջուրը ներքեւի յարկերը վնասած է, սակայն արժէքաւոր իրերը բոլորը վերի յարկերն են, հետեւաբար անվտանգ մնացած են:
«Բաւականին վնասներ տուած է ջուրը: Երկու օր է դուրս կը հանենք, վաղը նորէն պէտք է մակարդակը բարձրանայ, բայց ոչ այդ աստիճան: Արդէն բաւականին առաջընթաց կայ այդ առումով, բայց դեռ շատ բաներ կան մաքրելու: Մակընթացութիւն է, ամէն տարի ալ կը բարձրանայ-կ'իջնէ, բայց ոչ այդ աստիճան:
Ալիքները այնքան ուժգին էին, որ նոյնիսկ կղզիի դուրսի պատերը ջարդուած էր: Գրեթէ քանի մը օր վտանգներ պիտի ըլլան, բայց մեծ վտանգը անցած է»,-ըսած է միաբանութեան անդամը՝ աւելցնելով, որ իրենք նախապատրաստուած են նոր ալիքներուն:
Ան նաեւ յիշեցուցած է, որ 1966 թուականին մէկ թիզ աւելի բարձր էր ջուրի մակարդակը:
Նշենք, որ Իտալիոյ կառավարութիւնը 14 Նոյեմբերին արտակարգ դրութեան ռեժիմ սահմանած է Վենետիկի մէջ սաստիկ հեղեղման պատճառով: Հեղեղման ընթացքին ջուրի տակ անցած է Վենետիկի Սան Մարքոյի հրապարակը՝ քաղաքի գլխաւոր տեսարժան վայրերէն մէկը, բազմաթիւ կառոյցներ, շինութիւններ:
Սուրբ Ղազար կղզիի Մխիթարեան միաբանութեան մայրավանքի մատենադարանը, պատկերասրահը, ձեռագրատունը եւ դիւանը, բարեբախտաբար, չեն տուժած, սակայն գետնայարկի բոլոր սենեակները ողողուել են լճակի տղմոտ ջուրով, ջուրը լեցուած է նաեւ սեղանատուն: «Եկեղեցին եւս հեղեղուած է կէս մեթր ջուրով: Վնասուած են որոշ եկեղեցական զգեստներ եւ ձեռագործ զարդարանքներ ու գորգեր: Միայն առաւօտեան պարզ դարձած է, որ հարաւային հատուածին մէջ պարսպապատը քանդուած է: Վնասուած է նաեւ վանքի ծովախորշը կայանած «Արմենիա» առագաստանաւը»,-յայտնած էր Հայր Համազասպ Քէշիշեանը: