Երէկ Հալէպը թատերաբեմ դարձած է ծանր հրթիռարձակումներու։ Այս մասին «Արեւելք» տեղեկութիւն ստացաւ Հալէպի իր աղբիւրէն։
Տասնեակ հրթիռներ ինկած են «Ժամիլիյէ», «Հայ Ալ-Սախուր», «Հայ Ալ-Զահրաա», «Հալապ Ալ-Ժատիտա» եւ «Ալ-Սըրեան» շրջաններուն վրայ։
Հրթիռները պատճառած են մարդկային տոյժեր, ինչպէս նաեւ նիւթական մեծ վնասներ։
Յիշեցնենք, որ «Արեւելք» աւելի վաղ լրատւութիւն մը կատարած էր «Հայ Ալ-Զահրաա» շրջանին մէջ գտնուող «Արդարադատութեան պալատ»ին ահաբեկիչներու կողմէ թիրախ դառնալուն մասին, որուն հետեւանքով ալ ինկած էին վեց վիրաւորներ։
Ըստ «Շապաքաթ ախպար հայ ալ-Զահրա Հալապ» դիմատետրի էջին, երէկուան հրթիռակոծումներուն հետեւանքով զոհուած է Ապտըլ Հատի Ճամպազ անունը կրող քաղաքացի մը, որ 28 տարեկան էր։
Այս առաւօտ եւ դարձեալ ըստ մեր աղբիւրին Հալէպ քաղաքը բնականոն հունի մէջ է եւ քաղաքացիները սովորականին պէս փութացած են իրենց աշխատանքներուն։
Պիտի շարունակենք հետեւիլ Հալէպի զարգացումներուն։