Պոլսոյ «Մարմարա»էն կը կարդանք.
Թրքական ընդդիմադիր «Տիքէն» լրատու կայքէջը լրատւութիւն մը հրապարակած է` մամուլի մէջ հայերու եւ հրեաներու դէմ տեղ գտած ատելավառ գրութիւններու մասին:
Կը նշուի, որ 2018-ին թրքական մամուլի մէջ հրապարակուած է առնուազն 4839 յօդուած, ուր սլաքներ ուղղուած էին էթնիք եւ կրօնական խումբերու դէմ: Այս կարգէն 205 յօդուածներուն մէջ ատելութեան խօսք եղած է միաժամանակ քանի մը էթնիք կամ կրօնական խումբերու դէմ:
Ընդհանուր առմամբ ազգայնամոլ մամուլի մէջ թիրախ առնուած են 98 տարբեր խումբեր: Մասնաւորաբար հրեաներու դէմ մամուի մէջ հրապարակուած է առնուազն 1133, հայերու դէմ՝ 973 լրատւութիւն: Ապա յաջորդաբար՝ սուրիացիներու դէմ՝ 918 յօդուած, յոյներու դէմ՝ 672, տեղւոյն յունական համայնքի դէմ՝ 439, քրիստոնեաներու դէմ՝ 370 լուր:
Հայերու դէմ յօդուածները մասնաւորաբար առնչուած են Խոճալուի դէպքերու եւ 1915-ի ողբերգութեան մասին լուրերուն: Հայերը ներկայացուած են որպէս թշնամի:
Սուրիացիները կը մեղադրուին գողութեան ու զանազան յանցագործութիւններու ամբաստանութեամբ եւ դիտուած են որպէս հաւանական յանցագործներ:
Նշենք, որ ատելութեան խօսքով լուրերու 40 տոկոսը հրատարակուած է երկրի կարեւոր լրատուամիջոցներու մէջ, իսկ 60 տոկոսը՝ նահանգներու ու քաղաքներու տեղական թերթերուն մէջ:
Այդպիսի թերթեր են՝ «Եէնի Աքիթ»ը, «Միլլի Կազէթէ»ն, «Ենիչաղ»ը, «Միալթ»ը, «Տիրիլիշ Փոսթաս»ը, «Եէնի Գոնիա»ն, «Իսթիքլալ»ը, «Սամսուն Տէնկէ»ն, «Անգարա Անատոլու»ն եւ «Մէրսին Իմէճէ» թրթերը: