Անհայտ մարդիկ Բեյրութում գործող թուրքական դեսպանատան դռան վրա այսօր պաստառ են տեղադրել, որին Թուրքիայի դրոշի ֆոնին կմախք է նկարված: Այդ մասին տեղեկանում ենք արաբական մամուլից: Պաստառի վրա արաբերենով գրված է՝ «Ընթու քամեն ընդաբու» (հայերեն՝ «Դուք էլ նստե՛ք տեղներդ»-խմբ.):
Արաբերենով այս արտահայտությունը վերջին օրերին հաշթագ է դարձել սոցիալական ցանցերում: Օրեր առաջ «Հըզբոլլահի» առաջնորդ Հասան Նասրալլան, դիմելով Իսրայելի ղեկավարությանն ու Իսրայելին աջակցող տերություններին, ասել էր՝ «Նստե՛ք տեղներդ»: Արտահայտությունն անմիջապես թուիթերյան հաշթագի էր վերածվել, որի միջոցով «Հըզբոլլահի» գաղափարակիցներն ու համակիրները հազարավոր գրառումներ են կատարել:
Այսօր Բեյրութում Թուրքիայի դեսպանատան վրա տեղադրված պաստառը, օգտագործելով Նասրալլայի խոսքերը, ակնարկում է Բեյրութ-Անկարա՝ վերջին օրերին լարված հարաբերությունները, որոնք բորբոքվել են Լիբանանի հանրապետության նախագահ զորավար Միշել Աունի Օսմանյան կայսրության մասին կատարած հայտարարություններից հետո։ Լիբանանի նախագահը «պետական ահաբեկչություն էր» որակել Օսմանյան կայսրության գործողությունները՝ 20-րդ դարի սկզբին:
Թուրքիայի Արտաքին գործերի նախարարությունը բուռն կերպով արձագանքել էր Լիբանանի նախագահի հայտարարարություններին՝ անմիջապես կանչելով Լիբանանում Թուրքիայի դեսպանին և բացատրություն պահանջելով նրանից:
Աունի խոսքին անդրադարձել է նաև Թուրքիայի իշխող «Արդարություն և զարգացում» կուսակցության (ԱԶԿ-AKP) խոսնակ Օմեր Չելիքը: Նա անընդունելի է համարել Լիբանանի նախագահի՝ Օսմանյան կայսրությանը հասցեագրած խոսքերը։
«Լիբանանի նախագահն ասում է, որ Օսմանյան պետությունը լիբանանցիների նկատմամբ պետական ահաբեկչություն է կիրառել։ «Պետական ահաբեկչություն» արտահայտությունը մենք կտրականապես մերժում ենք, դատապարտում և առարկում», - հայտարարել է Չելիքը։
Ըստ թուրք խոսնակի՝ Լիբանանի համար լավագույն կառավարման մոդելը կիրառել են հենց օսմանցիները, իսկ օսմանյան տիրապետությունից դուրս գալուց հետո գերտերությունները տարածաշրջանում գաղութացման քաղաքականություն են վարել։
Բեյրութ-Անկարա հարաբերությունները շարունակում են մնալ լարված: