Հայաստանի պատմական կապերը եւ հայկական ներկայութիւնը Մերձաւոր Արեւելքի մէջ ունին քաղաքակրթական նշանակութիւն: Այս մասին ելոյթ ունենալով դեսպաններու եւ դիւանագիտական գերատեսչութիւններու ղեկավարներու հաւաքի ժամանակ ըսած է արտաքին գործոց նախարար Զոհրապ Մնացականեանը:
Անոր խօսքով՝ այդ կ'արտայայտուի այնպիսի արժէքներու մէջ, ինչպիսիք են հանդուրժողականութիւնն ու երկխօսութիւնը, կրօններու՝ քրիստոնէութեան եւ իսլամի խաղաղ գոյակցութիւնը:
Հայ ժողովուրդը աւանդական բարեկամութեան ամուր հիմքեր ստեղծած է Եգիպտոսի, Լիբանանի, Սուրիոյ եւ Իրաքի ժողովուրդներու հետ:
«Սուրիական ճգնաժամը անմիջական ազդեցութիւն ունի Հայաստանի եւ տարածաշրջանին մէջ հայկական ներկայութեան վրայ եւ չի կրնար մատնուիլ անտարբերութեան։ Սուրիոյ մէջ գործող Հայաստանի մարդասիրական առաքելութիւնը կ'իրականացուի այս մտահոգութիւնները հասցէագրելու նպատակով», - ըսած է նախարարը՝ աւելցնելով, որ Հայաստանը հետեւողականօրէն կ'ընդլայնէ իր ներգրաւուածութիւնը նաեւ Ծոցի երկիրներուն մէջ:
«Հայաստանը մտադիր է զարգացնել իր յարաբերութիւնները Մերձաւոր Արեւելքի բոլոր երկիրներուն հետ առանց բացառութեան՝ հիմնուելով իր արտաքին քաղաքական հռչակած սկզբունքներուն վրայ», - ըսած է ԱԳ նախարարը: