image

Հարիրի կը մեկնի Ուաշինկթըն. Լիբանանի վարչապետը նոր առաքելութիւն ունի

Հարիրի   կը  մեկնի Ուաշինկթըն. Լիբանանի   վարչապետը նոր առաքելութիւն ունի

 Լիբանանի  վարչապետ Սաատ Հարիրի   այս առաւօտ  Ուաշինկթըն   կը  մեկնի։

 

 Ըստ լիբանանեան լրասփիւռներու  Հարիրի   Ուաշինկթընեան  այցելութեան հիմնական օրակարգը   յատկացուած պիտի ըլլայ «Հըզպալլա»ին։

 

 Այստեղ հարկ է  նշել, որ  յատկապէս  Իրան-ԱՄՆ   յարաբերութիւններու   լարումէն   ետք Միացեալ Նահանգներու      նախագահն  ու անոր  շուրջ   գտնուող  գլխաւոր դէմքերը մէկէ աւելի առիթներով  արտայայտուեցան   «Հըզպալլա»ն   «նեղ կացութեան» մատնելու իրենց  հին-նոր ռազմավարութեան մասին։

 Ամերիկացիներուն  համար  այսօրուան կտրուածքով    նպատակը  «Հըզպալլա»ն   ռազմական թիրախ դարձնելը չէ,  այլ    մերձաւոր Արեւելքի  մէջ Իրանի   «ձեռքեր»ը  համարուող  շիիթ կուսակցութեան նիւթական  ամպարկոյի    ենթարկելը։

 Այդ  անշուշտ կը նշանակէ, որ Միացեալ Նահանգներ  կարեւոր   ճիգեր  պիտի իրականացնէ   նախ    սահմանափաելով «Հըզպալլա»ին  ուղորդուող     նիւթական    օժանդակութիւնները,  երկրորդ     թիրախ  դարձնել եւ նոյնիսկ  դատական  հետապնդում իրականացնել   լիբանանցի այն       գործիչներուն դէմ, որոնք  կը համարուին  «Հըզպալլա»ն     ֆինանսաւորող    ձեռներէցներ։

 

 Այս բոլորին դիմաց Հարիրի  յայտնուած է բաւական  բարդ առաքելութեան  մը մէջ։

 Ան մէկ կողմէ   պիտի «պայքարի», որպէսզի ամերիկացիք   ի վերջոյ «հասկնան»  եւ ընդունին, որ «Հըզպալլա»ն   լիբանանեան   քաղաքական  կեանքի  կարեւոր  բաղկացուցիչներէն  է ու նաեւ  կառավարութեան մաս  կազմող  քաղաքական  ուժ է  եւ երկրորդ ու ամենակարեւորը, որ «Հըզպալլա»ի  բոլոր քայլերը  ունին  «կարմիր գիծեր»  հետեւաբար    շրջանային   առումով   ամերիկացիք   տեղ  չունին «Հըզպալլա»ի  մասին  մեծ   մտավախութիւններ    ունենալու։

 

 Այս բոլորէն  անդին   յստակ է նաեւ, որ Հարիրի կը  քալէ   իր հօր      Լիբանանի  նահատակ  վարչապետ   Ռաֆիք  Հարիրիի     ճանապարհով,  այն իմաստով, որ ան  պիտի փորձէ  ամէն գնով ամերիկացիները  համոզել  ետ կանգնելու     Լիբանանի  դէմ   օղակը  սեղմելու ծրագիրներէն ու այդ կերպ ան պիտի  շահի  ներ-լիբանանեան     նոր  դրական  վարկանիշ,  դառնալով   «Հըզպալլա»ի  համար  ընդունելի  եւ վստահելի  սիւննի    գործընկերը։

 

 Ի դէպ ուշագրաւն  այն է,  որ  Հարիրիի   այս   ճիգերը տեղի կ՚ունենան  այն  պահուն, երբ սիւննի  աշխարհի  գլխաւոր խաղացողները  տարուած ըլլալով    յատկապէս Եէմէնի   խնդրով    գրեթէ  դուրս  եկած են   լիբանանեան  խաղէն...։

 

  Հետաքրքրականն  այն է, որ  արդեօք  սիւննիները պիտի «մարսեն»     Հարիրիի այս  համարձակ  քայլերը,  որոնց հիմնական   նպատակն է Լիբանանը հեռու պահել   ԱՄՆ-Իրան  գեր լարուած   իրավիճակէն։