Հայաստանի մօտ Իսրայէլի նորանշանակ դեսպան Էլիաւ Պելոցերքովսկին, 1915ին Թուրքիոյ մէջ կատարուած հայերու կոտորածները կը համարէ 20րդ դարու պատմութեան ամենամեծ կանխամտածուած սպանութիւնը:
«Արմէնբրես» հաղորդած է, թէ դեսպանը նման տեսակէտ յայտնած է Երեւանի մէջ Իսրայէլի անկախութեան 71-րդ տարեդարձի կապակցութեամբ կազմակերպուած ընդունելութեան՝ լրագրողներու հետ զրոյցի ընթացքին: Անդրադառնալով լրագրողի այն հարցին`թէ Իսրայէլը չէ ճանաչած Հայոց ցեղասպանութիւնը, արդեօ՞ք հնարաւոր է փոփոխութիւն տեղի ունենայ, մանաւանդ որ դեսպանը այցելած է Ծիծեռնակաբերդ, դեսպանը պատասխանած է.-«Այդ սարսափելի ողբերգութիւն էր, այդ 20-րդ դարու պատմութեան եւ մարդկութեան պատմութեան ամենամեծ կանխամտածուած սպանութիւնն էր: Հրեաները, յատկապես այն մարդիկ, որոնք կ'ապրին Իսրայէլ, աշխուժօրէն հանդէս կու գան անոր դէմ, եւ այդ նաեւ քննարկուած է մեր խորհրդարանի կողմէ»:
Լրագրողը նկատեց, որ դեսպանը չօգտագործեր ցեղասպանութիւն բառը, դեսպանը նշեց, որ այդ բառի որոնման հարց չէ: Ապա շեշտեց, որ իսկապէս սարսափելի ողբերգութիւն է, եւ պէտք է քննարկել այդ պատմութիւնն ու ուսումնասիրել զայն, որպէսզի նման ողբերգութիւններ չկրկնուին:
Անդրադառնալով այն հարցին, թէ արդեօ՞ք Ատրպէճանի հետ յարաբերութիւնները չեն խանգարեր համագործակցութիւնը, ան նշեց,- Իսրայէլը, Հայաստանի նման, ունի իր հետաքրքրութիւնները, իր յարաբերութիւնները բազմաթիւ երկիրներու հետ, եւ այդ յարաբերութիւնները բաղկացած են տարբեր բաղադրիչներէ: Դեսպանը բնական համարեց այդ եւ շեշտեց,- «Մեր յարաբերութիւնները Հայաստանի հետ կը համարենք առաջնային եւ կ'ամրապնդենք զայն որքան հնարաւոր է աւելի շատ»: