Յառաջիկայ 14 մարտին Պէյրութի մէջ պիտի ներկայացուի լիբանանցի յայտնի տնտեսագէտ Մկրտիչ Հ. Պուլտուքեանի նորատիպը: Այս մասին «Արեւելք» տեղեկութիւն ստացաւ Պէյրութէն:
Հատորը պիտի ներկայացուի Լիբանանեան մշակութային շրջանակներուն մօտ իր յայտնի տեղը զբաղեցնող «Մահրաժան Ալ-Քիթապ Ալ-Լուպնանի» («Լիբանանի գիքրի փառատօն») գիրքի փառատօնին:
Կը նշուի նաեւ, որ հատորը պիտի ներկայացուի Անթիլիասի մարոնիներու Մար Իլիաս եկեղեցւոյ սրահին մէջ:
Պուլտուքեանի այս նորատիպը կը կրէ՝ «Պատերազմի ընթացքին ելեւմտական արդիւնաւէտ քաղաքականութիւնը. Լիբանանեան փորձառութիւնը» խորագիրը:
Յիշեցնենք, որ Պուլտուքեան յայտնի անուն է ոչ միայն լիբանանեան մակարդակի վրայ, այլ նաեւ արաբական ելեւմտական շրջանակներուն մօտ:
Պուլտուքեան նաեւ հեղինակ է տասնեակ հատորներու, որոնց մէջ կը շօշափէ Լիբանանի տնտեսական խնդիրները, ինչպէս նաեւ օսմանեան կայսրութեան ընթացքին արեւմտահայ ելեւմտագէտներու եւ սեղանաւորներու ունեցած ուշագրաւ դերը:
Հատորը հրատարակուած է արաբերէն լեզուով: