Լիբանանի օդերեւութաբանական վարչութեան վերջին տուեալներուն համաձայն, յառաջիկայ ժամերուն երկրի տարբեր շրջաններուն մէջ ծանր փոթորիկի ալիք մը ընթացք պիտի առնէ, որմէ ետք, ըստ նոյն աղբիւրին, «Նորմա» փոթորիկը հրաժեշտ պիտի տայ Լիբանանին:
Յիշեցնենք, որ անցնող 72 ժամերուն Լիբանանի յատկապէս լեռնային շրջաններուն մէջ աննախադէպ ձիւնաթափ գրանցուած էր: Լեռնային գլխաւոր ճանապարհները փակուած մնացած էին եւ երկրին մէջ տիրող կլիմայական պայմաններուն հետեւանքով կրթութեան նախարարութիւնը յայտարարած էր, որ վարժարանները պիտի փակեն իրենց դռները մինչեւ հինգշաբթի օր:
Յայտնենք նաեւ, որ կարգ մը ծովեզերեայ շրջաններու մէջ անձրեւային հեղեղներու հետեւանքով կազմուած էին «լիճեր», որոնց հետեւանքով ալ քաղաքացիները ստիպուած եղած էին ժամեր անցընել իրենց ինքնաշարժերուն մէջ, մինչեւ որ ճանապարհները վերաբացուին:
Յայտնենք, որ վերջին տարիներուն «Նորմա» անունը կրող այս փոթորիկը կը համարուի ամէնէն ուժգինը, որ կը հարուածէ Լիբանանի ոչ միայն լեռնային, այլ նաեւ ծովեզերեայ շրջանը: