Մինչ «Հըզպալլա»ի աղբիւրներ կը շարունակեն լռութիւն պահել երէկ տեղի ունեցած զարգացումներուն շուրջ, անդին Իսրայէլի վարչապետ Բենիամին Նաթանիահու կը շարունակէ մատ թափ տալ եւ սպառնալիքներ տեղացնել Լիբանանցի ժողովուրդին վրայ:
Անշուշտ խօսքը կը վերաբերի Քաֆարքիլա շրջանին մէջ գրանցուած զարգացումներուն, ուր ըստ իսրայէլեան աղբիւրներու, «Հըզպալլա» յաջողած է գետնափոր ուղիներ բանալ եւ այդ գետնուղիները բացայայտուած են իսրայէլեան բանակի մասնայատուկ ուժերու կողմէ:
Այս առումով հետաքրքրական է, թէ յառաջիկայ օրերուն ինչ զարգացումներ կրնան տեղի ունենալ: Արդեօք Իսրայէլ պատրա՞ստ է Լիբանանը հարուածելու, արդեօք Իսրայէլը պատրա՞ստ է «Հըզպալլա»ին հետ զինուորական նոր բախումներու երթալու:
Անշուշտ այս բոլորը կը նշենք, յիշեցնելով նաեւ, որ իսրայէլեան բանակի տարբեր աղբիւրներ վերջին ամիսներուն բացայայտ կերպով յայտարարած են, որ իրենք պատրաստ չեն «Հըզպալլա»ի դէմ դուրս գալու:
Այս յայտարարութիւններուն զուգահեռ, Իսրայէլի պատկան մարմիններ եւ յատկապէս Իսրայէլի վարչապետ Բենիամին Նաթանիահու, վերջին օրերուն ամերիկացի պատասխանատուներու հետ իր ունեցած շփումներու ընթացքին, բացայայտ կերպով, խնդրելու պէս պահանջած է ամերիկացիներէն, որ «վերջ տուէք Լիբանանի մէջ «Հըզպալլա»ի գործունէութեան»:
Այս շեշտով կատարուած իսրայէլցի գլխաւոր դէմքին յայտարարութիւնը ցոյց կու տայ, որ Իսրայէլ պատրաստ չէ «Հըզպալլա»ի հետ զինուորական բախման երթալու:
Ամէն պարագայի, յստակ է նաեւ, որ նոյնպէս մեծ խնդիրներու առջեւ է իսրայէլեան բանակը, որուն շարքերուն մէջ յոգնածութեան բացայայտ նշաններ ի յայտ սկսած են գալ:
Ի դէպ, այս փաստը կարելի է արձանագրել, հակառակ անոր, որ Իսրայէլի բանակը կը շարունակէ մնալ շրջանի ամէնէն ռազմունակ բանակներէն մին, սակայն «Հըզպալլա»ի որդեգրած «կերիլլայական» ռազմաոճը սկսած է լուրջ մտահոգութիւն դառնալ Իսրայէլի այս վարչակարգին: