Բրիտանական «The Guardian» թերթը յօդուած մը հրապարակած է, ուր նշուած է, ու Սահմանադրական եւ մարդու իրաւունքներու եւրոպական կեդրոնը Իտալիոյ կառավարութեան դէմ բողոք ներկայացուցած է այն բանէն ետք, երբ բացայայտուած է Սուրիոյ Ազգային անվտանգութեան ծառայութեան գլխաւոր պետ Ալի Մամլուքի եւ իտալացի բարձրաստիճան պաշտօնեաներու միջեւ տեղի ունեցած հանդիպումը:
Թերթին փոխանցմամբ, եւրոպական կեդրոնը համարած է, որ Իտալիա խախտած է Եւրոպական Միութեան օրէնքները, երբ համաձայնած է իր հողերուն վրայ կայացնել գաղտնի հանդիպումը, նկատի ունենալով, որ Ասատի անմիջական ղեկավարութեան ներքոյ գործող Մամլուքի դէմ 2011 թուականէն ի վեր երկրէն հեռանալու արգելանք սահմանուած էր Եւրոպական Միութեան կողմէ:
Եւրոպական Միութեան ներկայացուցած բողոքին մէջ նշուած է, որ Մամլուք ընթացիկ տարուան սկիզբը Իտալիոյ մէջ հանդիպում ունեցած է Իտալիոյ Ազգային անվտանգութեան նախկին սպայ Մարքօ Մինիթիի հետ, որ այդ օրերուն երկրի Ներքին գործոց նախարարն էր: Ըստ տարածուած լուրերուն, Իտալիոյ Ներքին հետախուզական ծառայութեան պետ Ալպերթօ Մանինթի նոյնպէս ներկայ գտնուած է հանդիպման:
Թերթը նշած է նաեւ, որ ըստ ոչ հաւաստի աղբիւրներու, Իտալիոյ իշխանութիւնները անձնական օդանաւով ապահոված են Մամլուքի տեղափոխումը Իտալիա: