5.09c
Երեվան
կրկ, նմբ 24
«Հայրենասիրութիւնը փողով ու թմբուկով չէ. Տարիներ շարունակ, գաղտնաբար, Թուրքիոյ ներքին գաւառներէն մարդիկ բերած ու հայացուցած են, որոնց վերջին ցայտուն օրինակը եղած է Հրանդ Տինքը», «Արեւելք»ին ըսաւ վերապատուելի Վահան Թութիկեան՝ անդրադառնալով համայնքի հայրենանուէր աշխատանքին:
Հերքելով համայնքի հասցէին վերագրուած անհիմն ամբաստանութիւնները, վերապատուելի Թութիկեան ցաւով նշեց, թէ «Հայաստանի մէջ, եղան անհիմն ամբաստանութիւններ մեր համայնքին նկատմամբ, զանազան պատճառներով: Ամբաստանութիւններ, որոնք, դժբախտաբար, հնչեցին եկեղեցականներու կամ մեր աշխատանքներուն անծանօթ մարդոց կողմէ», ան շեշտեց, որ Աւետարական համայնքը ժողովարան կամ աղանդ չէ:
Մայր Աթոռ Ս. Էջմիածինի հետ համայնքի յարաբերութիւններուն անդրադառնալով, Աւետարանական համայնքապետը մանրամասնեց, որ համայնքը ներկայիս հաղորդակցութեան մէջ է Էջմիածինի Մայր Աթոռին հետ:
Աւետարանական համայնքի առաջնահերթութիւններու կարգին է հայրենիքը, «Մենք Հայաստան եկած ենք՝ ծառայելու եւ բարգաւաճելու այս հայրենիքը, որպէսզի ան ալ իր կարգին կարողանայ իր զաւակները պահել»,-ըսաւ ան: Այստեղ, ըստ վերապատուելի Թութիկեանի, համայնքն ամէն գնով կ′աշխատի զօրացնելու իր ներկայութիւնը, օգնելու հայութեան: «Վերջին հաշուով, այս կտոր մը հողն է մեր ապագան: հողը մեր ոտքին տակէն կը սահի Սփիւռքի մէջ, յատկապէս՝ Ամերիկայի կամ Հարաւային Ամերիկայի մէջ: Եթէ մեր գոյութիւնը պահած ենք, պատճառն այն է, որ միշտ Ամերիկա գաղթողներ եղած են, ամէն առիթի նոր արիւն, նոր աւիւն մը կայ: Սփիւռքը՝ ունայնութիւն է: Վերջ ի վերջոյ, պիտի կորսնցնենք մեր էութիւնը, պիտի աշխատինք մինչեւ այն ատեն, որ կարող ենք»:
Հայաստան կատարած այցի աւարտին հասնելով, վերապատուելի Թութիկեան շեշտեց, թէ «Ամէն անգամ, երբ Հայաստան կու գամ ինծի համար իսկական ապրում է: Այստեղ է մեր հայրենիքը, 3000-4000 տարիներու պատմութիւն է: Իւրաքանչիւր քար, իւրաքանչիւր վայր մեզի համար սիրելի է, պատմութիւններով լեցուն: Անշուշտ մեր սրտերը ուրախութեամբ կը լեցուին, բայց գիտենք նաեւ, որ դժուարութիւններ կան եւ չենք վարանիր յայտնելու զանոնք: Այս երկիրը մենք դրախտի կրնանք վերածել, եթէ սփիւռքահայ բոլոր մեծահարուստներուն ուժերը դէպի հոս կեդրոնանան»: Թութիկեան համոզուած է, որ նախկին Խորհրդային Միութեան ոչ մէկ հանրապետութիւն Հայաստանի չափ ուժեղ Սփիւռք ունի եւ այնքան օգնութիւն կը ստանայ, որքան մեր երկիրը: Սակայն հայրենի իշխանութիւններն ալ պէտք է քաջալերեն Սփիւռքը: Բազմաթիւ միլիոնատէրներ պիտի գան այստեղ, գործ պիտի ստեղծեն, որովհետեւ այստեղ է մեր փրկութիւնը:
«Մեր գոյութեան վերջին գրաւականն ու խարիսխը հայրենիքն է: Ճիշդ է, կատարեալ չէ բայց մենք ամէն ջանք պէտք է թափենք, որ այս կտոր մը հողը պահենք, զարգացնենք եւ մեր ապագան հոս կերտենք», իր խօսքը եզրափակեց «Արեւելք»ի զրուցակից, Աւետարանական համայնքի հովուապետ վերապատուելի Վահան Թութիկեան:
