Քեսապ-(«Արեւելք») Պատերազմի հետեւանքով դժուարին պայմաններու մէջ յայտնուած սուրիահայութեան օգնութեան ձեռք երկարելու նպատակով խումբ մը ձեռներէց մոսկուահայեր հանգանակութիւն կատարած են: Անհատական ճիգերով սկիզբ առած հանգանակութեան արդիւնքով անոնք 100 թոն ալիւր գնելէ ետք, ռուսական կողմին համաձայնութեամբ, պարէնը հասցուցած են Սուրիա: Սուրիոյ նաւահանգիստներէն մէկը (նաւահանգիստին անունը ապահովական պատճառներով «Արեւելք» չի հրապարակեր-խմբ.) հասած ալիւրի բեռը փոխադրուած է Քեսապ եւ յանձնուած պատկան մարմիններուն: «Արեւելք»ի՝ Սուրիոյ աղբիւրին փոխանցմամբ, մոսկուահայերուն կողմէ իրականացուած սոյն նախաձեռնութեան գլխաւոր համակարգողը եղած է մոսկուաբնակ՝ Արման Չուկուրեան, իսկ Սուրիոյ մէջ ուղեբեռի ստանձնման աշխատանքներուն հսկած է Հայ Կաթողիկէ եկեղեցւոյ Գամիշլիի հոգեւոր հովիւ Տ. Անդրանիկ Վրդ. Այվազեան:
Կը փոխանցուի նաեւ, որ ուղեբեռին առաջին կէսը ( 50 թոն) պիտի բաժնուի Քեսապի, Լաթաքիոյ եւ Դամասկոսի մէջ, իսկ մնացեալ 50 թոնը քիչ առաջ հասած է Հալէպ:
Մեր աղբիւրը նաեւ պարզած է, որ ուղեբեռի փոխադրութիւնը սիրայօժար կերպով կատարած է Ռուսաստանի բանակը, որ աշխատանքը կատարած է՝ մեր հայրենակիցիներուն օգնութեան ձեռք մեկնելու պատրաստակամութեամբ:
Մեր աղբիւրը կը նշէ, որ մոսկուահայերու այս նախաձեռնութիւնը առաջինն է իր տեսակին մէջ, ըստ «Արեւելք»ի տիրապետած տեղեկութիւններուն, շատ հաւանական է, որ մօտիկ ապագային եւս նման նախաձեռնութիւններ կրկնուին: