image
Հրատապ լուրեր:

Իմացեալ մահով անմահացաւ... Քրիս Յարութիւնեանի յիշատակին.

Իմացեալ  մահով  անմահացաւ... Քրիս Յարութիւնեանի  յիշատակին.

Ամէն անգամ , ուր փորձեցի մատիտս շարժել մահագրութեան տողերով, նուազագոյն պարտքս մատուցել, նահատակ Քրիստափոր Յարութիւնեանի յիշատակին, մտածումներու շղթաս ընդհատուեցաւ, կենդանի Քրիսը իր հեզահամբոյր ժպիտով, միշտ մարմնաւորուած տեսնելով իմ առաջ, յառելով, թէ «մի՛ փորձեր յանձնել զգացումներդ թուղթին, այդ մէկն ա՛լ անընդունելի է ինծի համար եւ պճնանքի համազօր արժեւորում է»: Վերջապէս, հաւաքեցի մէջս արիութեան խլեակներս, յիշատակներուս բեկորները քով քովի դնելով, մերժելով անսալ՝ համեստ ու խոհական մեր նահատակ ընկերոջ ընկերական խնդրանքին ու տատամսոտ սահեցուցի գրիչս:

Քրիսը՝ քանի մը առիթներով փորձեց գրկել մարտիրոսութեան գահը, բայց ազգի քերովբէները ետ դարձուցին զինք, եւ չարտօնեցին վաղահաս մուտք գործելու անմահներու դարպասէն ներս, որովհետեւ դեռ ե՛ւս իրեն վերապահուած էր առաքելութիւն, անաւարտ ընելիքներ, հանդէպ իր ազգին, հայրենիքին ու գաղափարակից ընկերներուն:
Ատենօք, որպէս ՀՅԴ պատանեկան միութեան դաստիարակ եւ վարիչ առաջնորդ, ան շեշտակիօրէն դրոշմեց զաւակներուս մէջ ազգային գաղափարական շունչ, ուր այս օտար ափերուն վրայ չէի կարծեր ուժգնութեամբ, պիտի խորասուզուէր եւ ամրագրուէր անոնց մատղաշ հոգիներուն մէջ: Պէտք է խոստովանիմ, որ ընկեր Քրիսին շունչով ջամբուած անբասիր դաստիարակութիւնը, զաւակներուս եւ իրենց տարեկիցներու համար, պիտի թռիչք առներ ու ծլեր ու դառնար ատաղձը գաղափարական հայորդիի իրենց կազմաւորումին:

Արցախեան գոյամարտի վաղ օրերուն՝ այլոց կողքին, ան ընդառաջեց հողի կանչին , արեւմտեան բարիքները ետեւ ձգած ու մերժելով խափուսիկ արեւմտեան «մեծ երազները», ներկայանալով պատնէշ, իր լուման ներդրելու Արցախեան գոյապայքարին: Վերջապէս, իր օրրանը դարձուց հայրենի աշխարհը, շիւղ առ շիւղ իր հոգեհատոր բոյնը կառուցելով հայրենի պաշտելի հողին վրայ։ Իր առօրեայով, կենսագործեց յանուն հայրենիքի եւ հայրենի հողին ջերմութեամբ ու բարիքներու բաւարուածութեամբ լիանալով, միշտ աչքերը սեւեռելով դէպի գետի այն ափին՝ ամբողջական Հայաստանի սահմաններ:

Մեր շրջապատի գերագոյն զոհողութեան պատրաստներու անհամար փաղանգին, լաւագոյն ներկայացուցիչներէն է Քրիսը։ Իր ծայր աստիճան խոհական յորդ պահուածքով եւ փարոսներու շլացուցիչ լուսարցակներու տեսադաշտէն խուսափող որպէս խիստ նկարագրի տէր՝ առ այդ կենսագործեց ու պատգամեց իր շրջապատին:

Մէկ տարի առաջ, երբ հայրը՝ հօրս հետ դրկից էին, յանձնուած Թորոնթոյի հիւանդանոցային բժշկական խնամատարութեան, պատեհութիւնը ունեցանք երկար զրուցելու իր ընտանեկան պարագաներուն հետ, Քրիսի բարեմասնութիւններուն ու իւրայատուկ ազգային-գաղափարական պահուածքին մասին։ Հիմա, գնաց եւ միացաւ իր գաղափարակից հօրը՝ ըսելով,- «Պապ՝ ես մօտդ եկայ, ինչպէս գիտես տէր եղայ տարիներ առաջ արտասանած երդումիս, որուն դուն վկան էիր»: Աւելցնելով, թէ «օրին բարձրաձայն բացականչեցի ի տես բոլորիդ՝ ...Իսկ եթէ հարկ ըլլլայ կեանքիս գնով ծառայել հայրենիքի ու հայութեան ազատագրութեան դատին»:

Քրիսը ունէր անտեղիտալի որոշումը, իմացեալ մահով անմահանալու, ու պայքարի ճանապարհին վրայ փռելու իր մարմինը, որպէսզի գալիք սերունդները հանգիստ անցնէին՝ մարտիրոսներով սալայատակուած կամուրջի վրայով, դէպի յաղթական նոր ափունքներ։

Այս օրերուն համացանցի վրայ երեւցող կամաւորներու հերթին կեցած իր խօսուն պատկերը, շատ բան կը խտացնէ իր մէջ: «ԿԻՏԱՆ ԿԱԼՄԱԶԻ» ճամբուն յառած՝ իր ամօթխած ու համեստութեամբ փայլատակող նայուածքները ու յաղթերգով օրհնաբեր շրթները, հպարտութեամբ կը մեներգեր՝ շարունակէ՛ք մեր սուրբ գործը Դաշնակցութեան վեհ քաջեր։
ՎԻՏՈՇԻ լեռան արեան շիթերու հետքերով, իր գաղափարակից զինակիցներուն հետ բարձրացան Վարանգաթաղի սրբացած բարձունքը, ու այս սխրանքով՝ միացան արծիւերու երամին, անմահութեան շղարշով պսակելով իրենց երթը։

Վշտակից ընկեր՝ Ժան Հալլաճեան Թորոնթօ, 12 Հոկտ. 2020