image
Հրատապ լուրեր:

1400 տարվա պատմություն ունեցող Սուրբ Անանիա եկեղեցին մարագ ու հարդանոց են սարքել իրենց պետքերի համար

1400 տարվա պատմություն ունեցող Սուրբ Անանիա եկեղեցին մարագ ու հարդանոց են սարքել իրենց պետքերի համար

Վանուհի Թովմասյան

 

 

Չեք հավատա, բայց ասեմ․․․

Մոտ երկու շաբաթ առաջ Բիթլիսի՝ մեր Բաղեշի, Անդենց գյուղում Խջեզարին տեսա։
Թինկ էր տվել արևկող պատին ու Սիամանթոյի կարոտը սրտում ակնապիշ ինձ էր նայում։
Այդ այն գյուղն էր, որ մեկ անգամ Խջեին ասել էին․


«Ով որ այսպես՝ յադին սիրե՝ նրա գլխուն սև կուգա,
Ինչ մեր գլխուն բերիր, Խաջե, բայց տես՝ ծովն էլ Նազուկա,
Վանա ծովն էլ, Սիփան սարն էլ մեզ մնացին Սասնո պես,
Էն Մասիսա սարին թառած արծվի բույն էլ կտամ քեզ,
Էլ հայոց շունչն այս կողմ չի գա, քեզ ի՞նչ թայ էր, թայդ կա,
Ես չեմ թողնի անդունդ ընկնի բախտը բեկի աղջկա»։

 


Այդ նաև այն գյուղն է, որ հիմա այնտեղ բնակվող արարածներն իրենց քյոշկը բոբիկ են մտնում, իսկ խոնարհված մեր մոտ 1400 տարվա պատմություն ունեցող Սուրբ Անանիա եկեղեցին մարագ ու հարդանոց են սարքել իրենց պետքերի համար։

 

 

 

 
Դա նաև այն գյուղն է, որ մեր պապենական տներն ավեր-զավեր են արել բարբարոսները, վրան էլ դաջել՝ «գորշ գայլեր»։
Այդ այն գյուղն է, որ մեր դարավոր Սուրբ խաչքարերն, իրենց օջախի կրակը քամուց պաշտպանելու համար, պատվար են սարքել լամուկները։
Այդ այն գյուղն է, որ մերն էր, բայց այլևս մերը չէ․․․

Հը՞․․․ Ցավե՞ց հոգիներդ, ոչինչ թող ցավի, որ ավելի նրբանկատ, կարեկից, սրտացավ ու հոգատար լինեք հետ բերված մեր Արցախի ու արցախցու նկատմամբ։
Որ վաղը մյուս օրը ձեր ժառանգները մեզ պես նորից որպես տուրիստ չգնան այնտեղ ու մղկտան ախուվախով․․․