Արտակ Բեգլարյան. Արցախի վարչապետի մամլո քարտուղար
Այսօր այցելեցի սիրիահայ Ասմարյան եղբայրների կողմից ստեղծված այգին՝ Ստեփանակերտից մոտ 10 կմ հեռավորության վրա:
Հիացած եմ, թե 4 տարում ինչ կարգի աշխատանք են կատարել նրանք. շուրջ 14 հեկտար տարածքում տնկել են ավելի քան 25 ծառատեսակ, և ամեն մրգից՝ մի քանի ենթատեսակ: Էլ չասեմ, որ այնպիսի ծառեր կան, որոնց մասին կա՛մ շատ քչերն են լսել Արցախում, կա՛մ էլ մտածում էին, որ դրանք այստեղ չեն կարող աճել:
Այսպես, օրինակ, այսօր ես համտեսեցի Արցախում աճած կակտուս և կիտրոն. Ասմարյաններն աճեցնում են նաև կիվի, պամելա, նարինջ, մանդարին, զեյթուն, մայրու ընկույզ, նուշ, շագանակ և մեր տարածաշրջանում քիչ թե շատ տարածված տարբեր մրգերի (դեղձի, ծիրանի, խնձորի, տանձի, նռան, թթի, խաղողի և այլն) նոր տեսակներ:
Նրանք օրինակելի այգեգործներ են Արցախում, և արդեն ոմանք, հետևելով նրանց օրինակին, սկսում են համարձակվել նոր ծառատեսակներ փորձել իրենց այգիներում: Համոզված եմ, որ ժամանակի ընթացքում նրանց ազդեցությունը կմեծանա, և Արցախում գրեթե բոլորը չեն պնդի, որ այստեղ նույնիսկ ծիրան չի աճում:
Ասմարյանները կիսակատակ դժգոհեցին, որ Արցախում չեն սիրում փորձարկումներ, այլ նախընտրում են միայն հնուց եկած մեթոդներին վստահել, կամ գոնե տեսնել հարևանի փորձարկման դրական արդյունքները, հետո հետևել նրա օրինակին: